Errezeta-liburua/Nafarroako pikillo piperrak bakailaoz beteak

Wikibookstik
Jump to navigation Jump to search

Nafarroako pikillo piperrak bakailaoz beteak[1]

Osagaiak[aldatu]

  • 20 piper gorri.
  • 200 g bakailao.
  • Tipula bat.
  • 2 baratxuri ale.
  • Oliba olio birjina.
  • Gurina.
  • 4 koilarakada irin.
  • 3/4 litro baserriko esne.
  • Etxeko tomate saltsa.
  • Gatza.

Pausoak[aldatu]

Errezeta hau bi egunetan egingo dugu. Lehenengo egunean, tipula zuritu, zati txikitan moztu, eta lapiko batean berotzen jarri, oliba olio zorrotada batekin eta gurin koilarakada batekin. Erregosi 20 bat minutuz. 4 koilarakada irin gehitu, nahastu, eta pixka bat egosten eduki ondoren, esnea gehituz joan poliki-poliki, guztia bukatu arte —esnea aurrez beroa badago, hobe—. Ondo nahastu, eta bexamel krematsu bat lortuko dugu. Bakailaoa xehatu, eta, bost minutuz, zartagin batean eduki oliba olio zorrotada batekin, su oso motelean, taparekin estalita. Ondoren, bexamela dugun lapikora gehitu. Bexamela hurrengo egunera arte hozkailuan gorde.

Gaurko errezetarako erabiliko ditugun pikillo piperrak freskoak eta aurrez etxean erretakoak dira, garai honetan baitaude sasoirik onenean. Dena den, kontserbakoekin ere goxoa aterako zaizue. Beraz, piperrak hartu, eta banan-banan bakailao masaz bete, koilara txiki baten laguntzaz.

Labeko erretiluan jarri bata bestearen ondoan, eta oliba olio zorrotada fin bat bota gainetik. Labea 160 graduan berotzen jarri, eta ondo beroa dagoenean, sartu piperrekin erretilua.

Bost edo zazpi minutu inguruz bertan eduki, eta ateratzean, prest ditugu mahaira zerbitzatu eta jateko. Plateretan jartzean, gainetik etxeko tomate saltsa beroaz busti ditzakegu.

Erreferentziak[aldatu]