Errezeta-liburua/Txekor tripaki eta muturrak, Bizkaiko saltsan

Wikibookstik
Jump to navigation Jump to search

Osagaiak[aldatu]

4 LAGUNENTZAT[1]

  • Kilo eta erdi tripaki.
  • Kilo erdi mutur.
  • Porru bat.
  • Bi tipula txuri.
  • Bi tipula gorri.
  • Txorizo zati bat.
  • Urdaiazpiko zati bat.
  • Hamar piper txorizero.
  • Gatza.
  • Oliba olioa.


Pausoak[aldatu]

1 Lehenik eta behin, ongi garbitu tripakiak, eta zati karratuetan moztu. Gauza berbera egin muturrekin. Gero, jarri ura presio eltze batean. Porruak eta tipula zuriak garbitu, eta jarri eltzean, zurituta baina osorik, gatz pittin batekin. Irakiten hastean, bota tripaki eta muturrak, tapatu, eta presio eltzearen tapa jarri. Utzi egosten ordubetez.

Bitartean, moztu tipula gorriak juliana moduan, eta erregosi beste lapiko batean, olio eta gatz pixka batekin, ordu erdi batez, su motelean. Jarraian, gehitu piper txorizeroen haragia lapiko horretara. Haragia ateratzeko egokiena zera da: piper txorizeroak urez beteriko erretilu batean sartu bezperan, eta han eduki gau osoan. Ondoren, piperraren haragia labana baten laguntzaz atera.

2 Presio eltzea ireki, eta hango salda, litro bat inguru, piper txorizeroak dauden lapikora gehitu. Txinoarekin, lapiko horretako osagaiak ongi xehatu, eta egositako tripaki eta muturrak gehitu. Su motelean ipini, eta hogei bat minutuz irakiten eduki, saltsa ongi loditu dela ikusi arte.

3 Zartagin batean, frijitu urdaiazpiko eta txorizoa, olio pittin batekin. Ahalik eta zati txikienetan moztu urdaiazpikoa eta txorizoa. Gero, tripakien lapikora gehitu. Beste bost bat minutuz irakiten eduki, eta jateko prest dago!

Erreferentziak[aldatu]