Sukaldaritza liburua/Errezetak/Kremaz beteriko krepeak

Errezeta-liburuaren parte. Kremaz beteriko krepeak

Osagaiak

Kremarentzako osagaiak :

• 8 arrautza.
• 225 gramo azukre.
• 100 gramo irin.
• Litro bat baserriko esne.
• Banilla-makila zatitxo bat.

Krepeak egiteko osagaiak:

• 6 arrautza.
• 200 gramo irin.
• 75 gramo gurin.
• 50 gramo azukre.
• Litro erdi esne.

Pausoak

Krema prestatzen hasiko gara lehenik. Lapiko batean esnea berotzen jarri, banilla makilatxoarekin batera, eta bitartean, arrautzen gorringoak ontzi batean jarri. Azukrea ontzira nahasi, eta bost minutuz etengabe irabiatu.

Ondoren, irina gehitu, eta kontu handiz nahasi. Berotutako esnearen erdia ontzira bota, eta ondo nahastu. Lapikoan gelditu zaigun esnea irakin artean berotu, eta banilla makilatxoa kendu; ondoren, ontzian duguna lapikora irauli. Bost minutuz irakiten eduki, etengabe nahastuz, eta gero, hozten utzi.

Krepeak egiteko, ontzi batean ondorengo osagai hauek nahastuko ditugu: arrautzak osorik, 50 gramo azukre eta 200 gramo irin; dena ongi irabiatu. Gero, esnea gehitu, eta nahasi. Zartagin ertain batera 75 gramo gurin bota, eta urtzean, aurreko ontzira nahasi.

Ondoren, zartagin bera berotzen jarri, eta beroa dagoenean, bertara kazokada bat krepe masa bota; zartagia alde batetik bestera suabe mugituz, masa zartagin guztira zabaldu. Segundo gutxi batzuen ostean, buelta eman, eta segidan, plater batera atera. Gainontzeko masarekin gauza bera egin.

Orain, krepe guztiak krema koilarakada batez bete, eta erditik moztu. Labeko erretiluan jarri, eta labean pare bat minutuz berotu ondoren, mahaira zerbitzatu. Nahi baduzue, karamelu saltsa batez busti, eta ukitu gozoagoa lortuko duzue.