Sukaldaritza liburua/Sukaldeko truko eta aholkuak

Arrainen prestaketetan truko eta aholkuak

Arrainen prestaketa

Aholkuak	Azalpena
Arrain fresko kantitatea mahaikideko	Hezurduna eta garbia ( erreboiloa, kokotea...) Mahaikide bakoitzeko 350 g.-450 g. inguru.
Arrain lodiak eta handixeagoak frijitzeko garaian	kontu handia eduki behar da ongi egiteko. Su bizian frijitzen badugu, posible da barrutik gutxi egina geratzea; kasu horretan, labean minutu batzuetan sartu beharko dugu.
Arrain xerra garbia, errazioak mahaikideko	150 g.-200 g. kalkulatu.
Arraina prestatzeko bi urrezko baldintzak	Freskoa izatea, puntutik ez pasatzea.
Arraina plantxan erretzeko nola gazitu	Arrainaren azalean gatza botatzen badugu, gehiago itsatsiko zaigu. Azalean, amaieran bota.
Arrainak olio errearekin amaitzeko	Labetik gutxi egina atera eta olio erre beroa gainera botata amaitu behar da, gehiegi egin gabe.
Bakailao bizkaitar eran egiteko errezeta	Gaur egun oinarrizko osagaiez gain, gehigarri asko gehitzen zaizkio
Bakailao brandada	Ondo hozturik dugunean, ogi txigortuen gainean zabaldurik jango dugu.
Bakailao gezatu ondoren prestatzeko	Gatza gehitu aurretik beti probatu, askotan ez baitu gatzik behar izaten.
Bakailao gezatu ondoren prestatzeko	Kozinatu aurretik, ongi lehortu behar da beti; bestela, ur asko bota dezake prestaketan, urtsuegia utziz.
Bakailao saltsak	Irinik gabe loditutako bakailao saltsak ez du irakin behar; bestela, moztu egingo zaigu.
Bakailaoa gehiegi egosi eta lehortu ez dadin	irakinaldiak edo kozinatze denborak laburra izan behar du.
Bakailaoa pil-pilean kozinatzeko	Garai batean bakailaoak kazola barruan sarturik zeudela loditzen ziren, baina modu horretara bakailaoa asko puskatzen da eta denbora gehiago behar du. Gaur egun askotan bakailaoa erretiratu eta saltsa apartean loditzen da, modu honetara arraia osoagoa mantentzen da.
Bisigua edo txitxarroa parrilan	Sukaldari ugarik ez dio perrexila jartzen, hori norberaren gustuen arabera.
Hegaluzea edo hegalabur xerrak	Arrautzeztatu eta frijiturik bikaina geratzen da.
Hegaluzea edo hegalaburra kozinatzeko	Kontu handia eduki hegaluzea gehiegi egin ez dadin, asko lehortzen da eta. Gutxi egina jatea da gomendagarriena.
Hegaluzea edo hegalaburra ontziratzeko	Bi egunetan egosten da botulismoa saihesteko.
Pil-Pil saltsa arinegia ez geratzeko	Bakailaoa gezatu ondoren, beti ongi lehortu behar da, bestela oso urtsua gera daiteke.
Pil-Pil saltsa berotzean ez mozteko	Su baxuan berotu behar dugu, inoiz ez du irakin behar.
Legatzaren puntua	Oso azkar egiten eta lehortzen da; eta, beraz, kontuz.
Legatza saltsa berdean muxilekin egiteko bada	ura erabiltzea (salda gabe) nahikoa izango da.
Txitxardinak (angulak) ohiko eran prestatuak	Zerbitzatuko ditugun lurrezko kazolak bainu marian berotuko ditugu, bestela txitxardinak azkar hozteko arriskua dago.
Txitxardinak (angulak) ohiko eran	Kontuz ibili gehiegi egin edo koipe kantitatearekin pasa gabe.

Arrautzaren prestaketetan truko eta aholkuak

Arrautzaren prestaketa

Aholkuak	Azalpena
Arrautza edo gorringoa errazago harrotzeko	Maria bainuan pittin bat berotuta, hobeto eta azkarrago harrotzen da.
Arrautza freskoa den jakiteko	Gorringoak zentratuta egon behar du, uretan ez du flotatu behar, edo belarri ondoan astintzen badugu, ez genuke barruko mugimendurik sumatu behar.
Arrautza galdarraztatua	Plater desberdinen lagungarri moduan erabiltzen da.
Arrautza galdarraztatzeko	Arrautza freskoa ez bada, zuringo guztia zabaldu egingo zaigu, eta itxura oso kaskarrarekin geratuko da.
Arrautza galdarraztatzeko	Gogoratu arrautza galdarraztatua egiteko oso freskoa izan behar duela, bestela arrautzaren zuringoa desegin egiten da.
Arrautza gogortua ondo zuritzeko	Freskoa izan dadila, gatz ugarirekin egosi; egositakoan, azkar ur hotzetan jarri eta zuritu.
Arrautza gogortuak ongi zuritzeko	Gatz ugarirekin egosi, azkar hoztu eta zuritu.
Arrautza nahaskia egiteko	azken pausoa oso azkar egin behar da, gehiegi lehortu ez daitezen.
Uretan pasatutako arrautzak osasun arautegia betetzeko, 50 minutuz 63ºC-an egostea da aukera.	Gatza gehitu aurretik beti probatu, askotan ez baitu gatzik behar izaten.
Arrautzak egosteko	Gatza ongi gehitzeak, ondoren zuritzen laguntzen du.
Arrautzak egosteko	Arrautzak denbora gehiegi egosten badira, gorringoak kolore berdea hartzen du.
Arrautzak egosteko	Ozpina aukerakoa da. Arrautza zartatuko balitz, zuringoari eusten laguntzen du.
Arrautzan salmonella saihesteko	Ez da inoiz urarekin busti edo garbitu behar, bestela bakterioak oskola zeharkatu baitezake.
Arrautzaren tamainak	Kontuz ibili, arrautza batek pisa ditzake 50 g. edo 100 g.; beraz, beti erdi mailako arrautzak erabili edo arrautza pisatuz lan egin.
Nahaskiekin kontraesana	Osasunaren ikuspuntutik, arrautza ongi egitea eskatzen duen legea dago, baina sukaldari gehienek arrautza krematsua edo gutxi egina nahiago dute.

Arroz eta zereal osoen prestaketak truko eta aholkuak

Arroz eta zereal osoen prestaketa

Aholkuak	Azalpena
Arroz esne on bat egiteko	Zein esne aukeratzen dugun oso garrantzizkoa da, eguneko esne pasteurizatua litzateke egokiena.
Arroz esnea esne-gainarekin?	Sukaldari batzuek esnea eta esne-gaina nahasten dute krematsuagao izan dadin. Hala ere, aukera horrek, osasun aldetik koipe gehiegi emando dio eta arroz esnea lehenago txartzeko arriskua izango da.
Arroz esnea ez itsasteko	Egosterakoan, kazolaren azpian heltzeko aukera handiak ditu; beraz, plantxa batean su baxuan eta oso gainean egotea komeni da.
Arroz esnearen dentsitate egokia	Sutan dagoenean lodia badago, hoztutakoan lehorra egongo da. Tarteko dentsitatea lortu behar dugu.
Arroza egoki gazitzeko	Arrozari gatza gehitzeko modurik onena egosteko gehituko diogun saldarekin edo urarekin egitea izango da.
Arroza egosi aurretik	Ongi garbitu fekula eta zikinak kentzeko.
Arrozaren puntua kontrolatzeko	Arrozari beti ur irakina gehitu edo irakiten dagoen kazolan jarri egosten. Eta beti denborak kontrolatu.
Arroza suelto geratzeko	Arroza erabili aurretik, beti ur hotzetan garbitu: zikinak eta irina kentzeko. Labean amaitu.
Arroza sueltoago geratzeko	Arroza salteatzeak, limoia gehitzeak eta labean amaitzeak arroz sueltoagoa izaten laguntzen du.
Arrozari gehitu beharreko likido kantitatea	Paella bat egiteko, ur kantitatea arrozaren pisuaren 2 eta 2,5 artean gehitzen zaio, eta bustian, berriz, arrozaren hirukoitza.
Artatxikia	Mota desberdinak daude, batzuk handixeagoak dira eta beste batzuk txikiagoak; bigarren hauek gozoagoak dira.
Kuskusa egosteko garaian	Ur eta olioarekin askatu beharrean, esnea edo gurina ere erabiltzen dira.
Kuskusa zenbat denboran egosi?	Semola guztiz gordina bada, denbora gehiago beharko du egosteko eta guztiz egosia erosten badugu, segituan egiten da; gaur egun azken hau da gehien erosten dena.
Zer da Kuskusa	Gari semola da. Gaur egun kasu gehienetan erdi egosirik saltzen dira. Horrek egosteko beharko duen denbora baldintzatuko du.
Kuskusa	Plater bakar moduan zerbitzatzen da.
Paella noiz jatea komeni da	Behin eginda dagoenean, ahalik eta azkarren jan beharra dago, bestela gehiegi egiten da.
Pilaf arroza nola amaitu	Labean sartzearekin, arroz sueltoago bat lortzen dugu.
Semola edo irin lodia	Gari alea birrintzeko garaian, ez dute irin bihurtzen, hondar edo zati handiagoak izan daitezke. Kuskusari ere gari semola deitzen zaio.
Sushi arroza egiteko ozpina	Japoniarrek bi ozpin mota erabiltzen dituzte, arrozarena normala, eta beste bat gozoa. Guk horiek izan ezan, sagardo ozpin epelari azukrea gehituko diogu edo mugurdi ozpina erabiliko dugu.
Sushi makiak egiteko	Makiak egiteko kanabera egurrarekin egiten den estera bat erabiltzen da. Izango ez bagenu, paper gardena edo trapu garbiren bat erabil genezake.
Sushi makiak estaltzeko	Alga beharrean sesamo beltza erabil daiteke.
Sushi makiak mozteko	Labana bustitako zapiarekin garbitzen da errazago mozteko.
Zereal osoak egosteko	Gogoratu zerealak egosteko garaian, saiatu likidoarekin gazitzen.

Barazki eta perretxikoen prestaketan truko eta aholkuak

Barazki eta perretxikoen prestaketa

Aholkuak	Azalpena
Aza gorria	Kolorea mantentzeko 5 minutuan irakin eta bere uretan hozten utzi.
Azalorea egosi ondoren	Kazolatik erretiratzeko garaian, bitsadera erabili eta inoiz ez irauli.
Azalorea egosteko denborak	Kontu handia izan egosteko denborak pasa gabe, azalorea erraz desegiten baita.
Baratxuri kantitate handiak izanez gero zuritzeko,	Nahikoa izango da 5 minutuz ur epeletan edukitzea.
Baratxuria xehatua oliotan kozinatzeko	Su motelean egitea komeni da, bestela erretzeko aukera handiak izango dira.
Baratxuria	Ernatzen denean, bihotza kentzea komeni izaten da, zapore garratza izan ez dezan eta ahora berriz etor ez dadin.
Baratxuria	Propietate emultsionatzaileak ditu, alioli saltsa, kasu.
Barazki berdeak egosteko	Denbora gehiegi edukiz gero, usain eta koloreak asko aldatuko zaizkio.
Barazki berdeak egosteko	Poliki poliki gehitu, ur irakinetara, irakinaldia gal ez dezan; hartara, kolorea hobeto gordeko du.
Barazki berdeak kolorea mantentzeko	Bikarbonato pittin batekin egos daitezke.
Barazki Salda	Barazki gehienak egositakoan, haien salda jaso eta prestaketa desberdinak bustitzeko erabil ditzakegu.
Barazkia frijitzen dugun aldiro	Olioa zikinduz gero, iragazi egingo genuke.
Barazkiak egosteko azukrea	Gatza botatzen diogun moduan, errezeta zahar ugaritan azukre pittin bat ere gehitzen zitzaion, hark barazkiaren zaporea indar zezan. Gaur egun, esaterako, orburuak edo zainzuriak egosteko garaian, mantentzen da toki askotan.
Barazkiak mikrouhinean egosteko	Ontziaren azpian 100ml gazitu jarri eta azalorea 11 minutuz egosiko dugu. Azenarioa 8 minutu.
Barrengorriak eta perretxikoak garbitzeko	Zapi busti batekin kontu handiarekin garbitu.
Entsaladako hosto berdeak nola ondu	Katilu zabal batean letxugak edo hosto berdeak jarri eta nahastu, erabili nahi dugun saltsa edo ongailuekin. Eskuen mamiekin kontu handiz nahastu. Hosto berdeak ongi bustirik ditugun momentuan, bertatik erretiratu, saltsa soberakina katiluan utziz.
Eskalibada nola bukatu	Zerbitzatzeko garaian, baratxuri xehatua eta oliba olio birjina gehitu daiteke.
Eskalibada nola jan	Sarrerako plater gisa edo lagungarri moduan jar dezakegu.
Guakamolea	Ahuakatea belztu ez dadin hezurra barruan sartuko dugu.
Lekak edo bainak egostean, kolorea mantentzeko	Bikarbonato pittin bat botata urari. Kasu horretan, alde txarra izango litzateke bitamina batzuk galduko lituzkeela.
Orburuak nola egosi	Modu desberdinak daude, gure kasuan osoak eta 18 minutuz egosiko ditugu. Hoztu ondoren, zuritzeko.
Perretxiko zikinak nola garbitu?	Zapi edo paper busti batekin, kontuz arraskatuz garbituko ditugu. Ziza horiak oso zikinak baleude, iragazki batean gehienez ere ur zurrusta indartsu batetik pasatuko ditugu. Inoiz ez ditugu beratzen edukiko.
Piper beteak	Piperrak arrautzeztatuta saltsan sartuko bagenitu, azal hori galdu egingo luke.
Piper beteak	Piperrak frijitu ordez, bete ondoren labean olio tanta batekin egin ditzakegu.
Pipermorroak labean errea	Kontu eduki behar da labean dagoen bitartean piperra ez dadin gehiegi lehortu. Horretarako beti hidratazio puntu bat izan behar du.
Piperrak labean erre ondoren erraz zuritzeko	Labetik atera ondoren estali egingo ditugu eta minutu batzuetan horrela eduki. Horrela, piperrei errazago kenduko diegu azala.
Tipula nola biltegiratu	Inoiz ez gorde patatarekin, usteldu egingo baitira.
Tomate heldua zuritzeko	Labana batekin azalean gurutze mozketa bat egin ondoren. 5 segundoz galdarraztatu eta erraz zurituko dugu.
Tomate saltsa birrintzeko	Birringailu elektrikotik pasatzean kolorea galtzen dute. Kolore horretatik zerbait berreskuratu nahi badugu, ondoren beti irakin egin beharko dugu.
Tomate saltsa kantitate handiak egiteko	Tomate natural birrindua gehitzen badiogu, oso gainean egon behar da, oso erraz itsasten baita, horrelakoetan tomatea zati handietan gehitu daiteke.
Tomate saltsa osagaiak	Azenariorik gabe edo tipularekin bakarrik ere egiten da errezeta hau.
Ziazerbak egosteko	5 minutuan gazitutako ur irakinetan. Segituan hoztu eta xukatu.

Denetariko truko eta aholkuak

Denetariko truko eta aholkuak

Aholkuak	Azalpena
Amaieran beti gatz puntua errepasatzea	Urrezko araua da.
Budina egosita dagoen jakiteko	Txotxa edo labana moldean sartu eta garbia aterako balitz, egina dagoela esan nahiko luke.
Budinak egosterakoan estali	Egosi aurretik aluminio-paperarekin estal daiteke zarakarrik ez egiteko. Baina zarakarra gustuko duen jendea ere badago.
Carpaccioa	Oso fin mozteko, aldez aurretik 10 minutuz haragi zatia izozkailuan sartu.
Eltze espresean egosteko denborak	Eltze espresean egosteko edo kozinatzeko denborak ohiko eltzean baino 4 eta 3 aldiz gutxiagoren artean izan ohi dira. Aldez aurretik, proba egitea komeni da guk nahi dugun puntua lortu arte.
Esnea egosterakoan gutxiago itsasteko	Egosteko kazolari azpian ur pittin bat jarri.
Espeziak eta belar usaina zein momentuan erabili	Lurrina hobeto mantentzeko azken momentuan erabiltzea komeni izaten da.
Espeziak eta belar usaintsuak noiz birrindu	Usaina freskoagoa izateko azken momentuan birrintzea komeni da.
Espeziak eta belar usaintsuak nola gorde	Komeni da toki ilun eta lehor batean edukitzea. Eta gordeko dugun ontzia itxita eta iluna izatea.
Espeziak eta belar usaintsuak non gorde	Ontzi ilun eta itxietan gordetzea komeni da.
Esterilizatzeko espres eltzea	Kontserba ontziak esterilizatzeko balio digu. 115ºC inguru.
Frijitu aurretik noiz irineztatu, arrautzeztatu behar den	Osagai nagusia hezea denean, modu honetan zarakar bat egin eta olioak zipriztinik ez egitea lortzen dugu.
Frijitzeko irinetan nola pasa	Lehenik ondo lehortu, irinetan pasa ondoren, irin soberakina kendu, irinetan pasa eta momentuan frijitu; frijiturik dugunean paper xurgatzailean jarri.
Frijitzeko modua	Olio bero ugaritan osagai bat murgiltzea, helburua izanik kanpotik txigortzea zarakarra eginez, eta barrutik hezea geratzea.
Frijitzeko nola zatitu osagaiak	Frijitzeko eta zuzenean jateko, osagaiek zati txikiak eta bigunak behar dute izan.
Gazta nola gorde	Ontziratua eta hozkailuko tokirik epelenean. Hozkailutik kanpo toki freskoa izanez gero.
Krema gaziak amaitzeko esne-gaina bai edo ez	Sukaldari askok amaieran esne-gain zurrusta bat gehitzen diote, baina jatorrizko zapore eta kolore asko kentzen dio.
Krema gaziak hoztu ondoren, kontu handiarekin berotu	Krema lodiak behin hoztuta, su oso baxuan eta gainean gaudela, Maria bainuan edo mikrouhin labean berotu.
Krema gaziak zein lagungarrirekin zerbitzatu	Ogi txigortu edo urdaiazpiko zati frijitu edo hauts egindakoarekin zerbitza dezakegu.
Kroketak biltzeko	Estalki fina lortu nahi badugu, irinik ez erabili, arrautza eta ogi birrindua bakarrik.
Kroketak irin zaporerik eduki ez dezan	Bexamela gutxienez 15 minutuz egosi behar da.
Kroketak nola frijitu	Beti olio bero ugarirekin eta inoiz ez bota kroketa ugari batera. Hori egingo bagenu, eta olioaren tenperatura asko jaitsiko balitz, puskatzeko arrisku handia izango lukete.
Lurrunetan egostea	Arrain, itsaski eta barazkien elikagaiak mantentzeko modurik onena da.
Marrubiak garbitzeko	Txortena beti garbitu ondoren kendu, inoiz ez lehenago
Meloi ona nola aukeratu	Meloi emeak hobeak dira; itxuraz, luzeagoak. Meloi zartatuak eta pikordunak beti lisoak baino hobeak. Azpialdeak biguna izan behar du, gogorra badu heldu gabea egongo da.
Mikrouhineko ontziak	Saiatu kristala erabiltzen beti.
Olio beroak zipriztin gutxiago egin dezan	Gatz pittin bat gehitu.
Ongailu usaintsuak noiz gehitu	Ez beti, baina amaieran eta azken momentuan lortuko dugu usain eta lurrin handiena.
Ontzi azpian itsatsitako prestaketekin zer egin	Sua azkar itzali eta harraskatu gabe beste ontzi batera utzi erortzen. Erortzen ez dena zakarretara bota. Kasu batzuetan patata zati batzuk gehitzen dira erre zaporea kentzeko.
Osagaien kolore zuria mantentzeko	Azalorea edo legatza egosteko, esne pittin batekin egos dezakegu kolore zuria mantentzeko.
Osagaien kolore zuria mantentzeko	Legatza edo txibia esnetan beratu dezakegu frijitu aurretik.
Perrexila xehatua izoztu	Askotan gertatzen zaigu, perrexil ugari izaten dugula momentu batean. Perrexila zehatu eta kristalezko ontzi txikietan gorde eta izoztea izango da aukera

Eltzekariak prestatzeko truko eta aholkuak

Eltzekariak prestatzeko

Aholkuak	Azalpena
Dilista lehorrak pertsonako eta mahaikideko	70 g. eta 80 g. bitarte kalkulatu.
Dilistak egosteko	Beratzen edukitzea aukera bat da. Baina beratu gabe ere ongi egosten dira.
Eltzekariak erre puntu bat dutenean, edo gaziegiak daudenean zer egin	Patata zati eder batzuk sartu, eta utzi denbora baten egosten barruan.
Garbantzuak egosteko denbora	Aldakorra da, txitxirio batzuk lehorragoak egoten dira eta halakoek denbora gehiago beharko dute.
Lekale errazioak pertsonako	Babarrunak eta garbantzuak, lehorrak, pertsonako eta mahaikideko 80 g. eta 100 g. bitarte kalkulatu.
Lekale eta eltzekoen hornigaiak nola zerbitzatu	Lekaleekin nahastuta edo aparte zerbitza daitezke.
Lekaleak egosteko ura	Mineral gutxiko uretan egosi behar dira.
Lekaleak errazago biguntzeko	Bikarbonato pitin batekin beratu.
Lekaleak gazitzeko	Lekaleak egosteko garaian, gatza beti amaieran gehitu behar da.
Lekaleak prestatzeko	Patata gehitu daiteke, saltsa gehiago eta azkarrago loditzeko.
Lekaleak ur hotzetatik edo berotatik abiatu egosteko	Garbantzuak edo txitxirioak izan ezik, beste eltzekari guztiak ur hotzetatik abiatu, egoste denboran ura gehitu beharko bagenio, beroa izan beharko luke.
Lekaleak, eltzekoak prestatzeko	Lagungarriak (txerri saiheskia, txorizoa, belarriak.....) lekaleekin batera edo aparte egos daitezke.
Patata duten eltzekarietan saltsa lodia gustuko badugu	Denbora gehiagoan egos genezake edo sardexka batekin patata batzuk birrindu.
Patata egosteko	Gogoratu patata ondo egosteko ur hotzetik abiatzea inportantea dela eta egositakoan, lehenbailehen jatea komeni dela. Hozten utziko bagenu, gogortu egingo litzaiguke.
Patata eta pasta prebiotiko moduan	Hozkailutik pasa eta almidoi hauek hoztu ondoren prebiotiko bikainak bihurtzen dira, hau da, gure hesteetan ditugun bakterioen janari bikaina. Gogoratu bakterio horiek inportanteak direla gure defentsak goian mantentzeko.
Patata tortilla lehorra edo guztiz mamitu gabea	Hemen ere osasuna zaintzeko legea eta arrautzak gutxi egina egon behar duela dioen sukaldarien legea elkarren artean kontraesanean daude.
Porru patatak edo porru salda bihurtzeko	Ur kantitate gehiago gehitu.

Gozogintza prestatzeko truko eta aholkuak

Gozogintza prestatzeko

Aholkuak	Azalpena
Almibarra egosteko garaian	Alboak brotxa busti batekin margotzea, bertako kristaltxoak disolbatuz, eta modu honetan karamelu ez bihurtzeko.
Azukre estalkia erabiltzeko	Epeldu egin beharko da.
Azukre estalkia gordetzeko	Hozkailuan plastiko gardenarekin estalita eduki daiteke.
Bavaroisea edo sufleak prestatzeko garaian	Esne-gaina nahasterakoan, kontu handiarekin egin behar da; inoiz ez irabiatu.
Bavaroiseak nola aurkeztu	Bustitako bizkotxo xaflen gainean aurkezten dira.
Biskuita ez jaisteko	Garrantzitsua da osagai guztiak nahasteko garaian, kontuz egitea jaitsi ez daitezen.
Biskuita mozteko	Labana bero bat erabiliko dugu.
Bizkotxo arinak lortzeko	Arrautza ongi harrotzeko tresneria ondo garbiturik eta lehorturik izan.
Bizkotxo arinak noiz eta nola atera moldetik	Behin moldetik atera eta hozteko, moldean zegoen posizio berean utzi behar dugu, bestela mahaira itsatsi egingo zaigu.
Bizkotxo harrotuarekin eginiko pasteletan	Jarabearekin ongi busti behar dira. Horrek pastelari behar duen hezetasuna emango dio.
Bizkotxo plaka jarabearekin bustitzeko garaian	Ondoren ijito-besoa egiteko kiribildu beharko bagenu, kontuz ibili behar da. Gehiegi bustiko bagenu, biltzerakoan puska daiteke eta gutxi egiten badugu, lehor gelditu eta orduan ere zartatu daiteke.
Bizkotxoa egina dagoen jakiteko	Txotxa edo labana txiki bat sartu behar zaio; garbia aterako balitz, egina dagoela esan nahiko luke.
Bizkotxoa noiz atera moldetik	Bizkotxo pisutsuetan (gurina eta koipea dutenetan) hoztu ondoren, eta bizkotxo arinetan labetik atera orduko.
Bizkotxoak arinak egiteko	Arrautzari irina kontu handiarekin nahastu behar zaio. Pauso honetan, inoiz ez da irabiatu behar, helburua lehenago harrotutako hori mantentzea da.
Budin bat egina dagoen jakiteko	Txotxa edo labana txiki bat sartu behar zaio, garbia aterako balitz, egina dagoela esan nahiko luke.
Budinak moldetik ateratzeko	Beti hoztu ondoren egingo dugu, beroan edo epelean ateraz gero, puskatzeko aukera handia izango dute.
Coulanta zer da	Gutxi egindako txokolatezko bizkotxo arin gisa defini dezakegu.
Coulanta zerbitzatzeko garaian	Coulanta ontzitik kanpora atera nahiko bagenu, aukeratutako moldeak goitik eta behetik irekia beharko luke izan. Hori moldetik ateratzeko zailago izango da. Horrela balitz, moldearen barrutik labeko paper tira bat erantsi beharko genioke, gurinez lagundurik.
Coulanta	Arrautza osoa erabili beharrean, zuringoa bakarrik ere erabil liteke
Coulantari marakuia edo pasio fruitua oso ondo doakio	Fruitu tropikal hauek, gurean zuku izoztua edo tetrabrikean saltzen dira. Naturala ere gero eta errazago eros liteke; baldin eta izango ez bagenu, edozein fruitu gorri balia dezakegu.
Edari izoztuak	Sorbetearekin konparatuz bere dentsitatea 8-10 baumekoa izan beharko du.
Esne-gaina harrotzeko	Tenperatura ez badugu errespetatzen, esne-gain harrotua jaitsi egingo zaigu.
Esne-gainak harrotzen denbora gehiegi ematen badugu	Kontuz, moztu daiteke eta gurina bihurtu.
Esnearekin prestatutako azkenburukoak mundialak izateko	Eguneko esnearekin edo pasteurizatuarekin prestatutako budinak, arroz esneak edo kremak beste zapore bat hartzen dute. Probatu.
Euskal Pastela edo opila	Orea egiteko garaian legamia pittin bat ere gehitu liteke, modu honetara, gaileta arinagoa izango da.
Fondanta erabiltzeko	Maria bainuan edo mikrouhinean epeldu daiteke bigundu eta erabili ahal izateko.
Fondantari kolorea eta zaporea emateko	Txokolatea, kafea, pistatxoa edo marrubia erabil daitezke, edo zuzenean, koloratzaileak gehitu daitezke.
Fruitu freskoarekin egindako tarta azkar jan	Fruitua azkar eraldatzen da eta oinarria bigundu, beraz egunean jateko pastela dugu.
Fruitu pastelak betetzeko	Pastel, laranja edo limoi kremak erabil litezke betetzeko.
Fruituak mikrouhinean egosteko denborak	500 g, udarea, melokotoi edo sagar zatituak, limoi zuku eta ur pittin batekin, estalita 4 minutu inguru, 800W.
Fruta eta jogurta mikrouhinean epeltzeko denbora	15 segundo. 800W.
Fruta hoberenak erosteko	Frutarik gozoenak, zartatuak daudenak izaten dira. Azukre kantitateak eragiten du zartadura; halakoak supermerkatu handietan baztertu egiten dira. Hori zozoek eta txoriek ondo dakite.
Gainetik distira eman eta kontserbatzeko	Gelatina mota desberdinak, almibarrak edo marmeladak erabil ditzakegu.
Gelatina urtzeko	35ºC-tik gora hasten da urtzen.
Gelatina kopuruak	Lortu nahi den dentsitate edo gogortasunaren arabera alda daiteke.
Gelatina prestaketa urtzeko	Behin gogorturik, bainu marian berriro bigundu dezakegu.
Gelatina prestaketak nahiko gelatina duen azkar jakiteko	Gelatina prestaketa bero horren kantitate txiki bat ontzi txiki batean hozkailura sartu. Modu horretan ikusiko dugu ea ondo mamitzen den, eta era horretan, zuzentzeko aukera izango dugu.
Gelatina ur litro bakoitzeko	30 g eta 40 g gelatina bitartean, nahi dugun gogortasunaren baitan. Oinarrizko likidoaren dentsitatea handiagoa den heinean, gelatina gutxiago erabiliko da.
Gorringoak eta arrautzak hobeto harrotzeko	Maria bainuan errazago harrotzen dira. Baina kontuz, urak inoiz ez du irakin behar, bestela, gorringoa mamitu egingo da.
Gurina mikrouhinean bigutzeko	100 g gurin biguntzeko 20 segundo.800W
Hostore orea egiteko ur kantitatea	Proteina kopuruaren baitan, ore honek ur gehiago edo gutxiago beharko du. Irina zenbat eta indartsuago izan, orduan eta ur gehiago onartuko du.
Hostore orea egiteko ura ahalik eta hotzen erabili eta prestaketa gela ere hotz egotea komeni da, baita luzatuko dugun mahaia ere	Berotasunak, gurina biguntzen du eta luzatzea zaildu egiten du.
Hostorea egitean	Gurina kanpora ateratzen ikusiko bagenu, hurrengo buelta eman aurretik, hozkailuan ongi hoztu.
Hostorea egiteko garaian zenbat buelta eman	Zenbat eta buelta gehiago eman labean, orduan eta gehiago altxatuko da. Baina bueltetan pasatuko bagina, kapa desberdinak batu eta ez litzateke altxatuko.
Hostorea egiteko behin gurina orean sartuta ez da inoiz eskuekin oratu edo puskatu behar	Bildu beharko bagenu, beti kapak osatuz bezala egin beharko genuke.
Hostorea egiteko irin egokiena	Indar irin erdia edo 2/3 bat erabiltzea garrantzizkoa da hau da %9-tik %11-ra bitarteko proteina kopurua duten irinak. Irin ahula erabiltzeak, luzatzea asko erraztuko du baina ez da berdin altxatuko.
Hostorea egiteko koipea	Goxoena gurina erabiltzea bada ere, prestatzeko garaian zailtasunak ditu fusio tenperatura baxua duelako. Hori dela eta, gaur egun margarina bereziak saltzen dira fusio tenperatura altuagoekin hostoreak errazago egiteko.
Hostorea egosteko	Prestatu behar behar dugun hostore zatiaren tamainaren arabera, ohikoena 220ºC-200ºC gradutan egostea izaten da.
Hostorea luzatzeko gantza barruan ongi banatzen saiatu	Hori gainera, gantza gehiegi bigundu edo kanpora irten gabe egin behar da.
Irin oreak	Prestatzen ditugunean, komeni da pauso aldaketetan minutu batzuk pausatzen uztea.
Izozki eta sorbeteen dentsitatea	Zukua izozki edo sorbete makinan sartu aurretik, dentsitatea 18-20ºBé izatea komeni da. Horrela ez balitz, zuzentzeko aukera izango dugu, almibar edo zuku gehiago gehituz.
Izozki, sorbete edo biskuitak	Zerbitzatu baino minutu batzuk lehenago, izozkailutik ateratzea komeni da.
Izozkia edo sorbetea egiteko gailuak erosteko garaian	marka batzuek bi gailuak bereizi egiten dituzte; hala ere, oso antzekoak dira eta biek balio dute bata zein bestea egiteko.
Kanela makilak likidoekin erabiltzeko	Lehen aukera, guk lurrindu nahi dugun likidoan zati handiago bat egostea, ondoren kanela makil hau garbitu, lehortu, eta hurrengo erabilera batetarako gorde liteke. Bigarren aukera makil zati txikiago bat eskuekin likidora zatitu eta irakin ondoren iragaztea, kasu honetan kanela bota egingo genuke.
Karamelua mikrouhinean egiteko	100 g., bi koilarakada ur eta 4 minutu.
Mahuka ore bigun horrekin betetzen dugunean	Puntan behatza jarriz edo muturra gorantz okertu beharko dugu, oreak ihes egin ez dezan.
Marmelada azukre gutxiagoarekin egina	Egin badaiteke ere kasu horretan ez da kontserbatuko denbora luzez.
Marmelada egosten den bitartean	Ur hotzetan bustitako brotxa bat pasa kazolako alboetan, hura garbi mantenduz, eta karamelurik egin gabe edukiz.
Marmelada epe luzerako gordetzeko bada	15 minutuz esterilizatu.
Marmeladak egiteko fruituak	Helduekin egitea komeni da.
Marmeladak erabiltzean arintzeko	Pittin bat berotu edo ur beroa gehitu.
Marmeladari nahi izatera, gelatina orriren bat gehitu dakioke	Hobeto kontserbatzeko, argiago izateko eta gorputz gehiago izan dezan.
Natilla finak egiteko garaian, zaindu beharrekoa	Kontu izan tenperatura gehiegi ez igotzearekin, 83ºC-tik pasatuz gero, gorringoa mamitu egingo da eta pinporta modukoak sortuko zaizkio.
Natilla finak erabiltzeko	Azkenburukoen saltsa moduan edo bainilazko izozkiaren oinarri bezala erabil dezakegu.
Natilla finak ez mamitzeko	Termometrorik izango ez bagenu, erreferentzia da, krema lurrintzen hasten denean edo pittin bat loditzen; hori ikusitakoan, atera pertza Maria bainutik.
Natilla finak izozkiak egiteko	Saltsa krematsuagoa nahi izanez gero, bereziki izozkientzat esnearen erdia esne-gainarekin ordezkatzen da.
Natillak arto irin finduarekin egiteko	Maria bainuan edo oso su baxuan egostea komeni da gorringoak ez daitezen mamitu eta itsatsi kazolan.
Opil gozoak	Bigarren hartzidura pasa ondoren, ahalik eta azkarren egosi behar dira ez lehortzeko.
Plum cakea	Jatorrizko errezetan, pasak gehitzen zaizkio. Hala ere fruitu konfitatu desberdinekin ere asko egiten da. Orearen erdiari kakaoa gehitu, eta horrek ematen duen koloreen eta zaporeen kontraste modua ere asko erabiltzen da.
Sagar tarta	Gurean Errezil sagarra lortzerik bagenu, bera izango litzateke onena. Hura lortzerik ez bagenu, sagar gogorrak komeni.
Sagar tarta	Zenbat eta sagar gehiago izan, orduan eta gozoagoak geratzen dira.
Suflea egosteko	Labean egosteko garaian, hau ez da ireki behar.
Suflea noiz jan	Labetik atera orduko jatea komeni da, erraz jaisten baita.
Tatin tarta moldetik ateratzeko	Pastelak epel egon behar du. Beroan ateratzen badugu, sagarra zabaldu egingo da eta hotzean, aldiz, azukrea moldera itsatsita izango da.
Tatin tartan, sagar kopurua	Moldea sagarrez ongi estali beharra dago, indar eginez azken sagar erdia sartzeko.
Teilak	Oso delikatuak dira eta hoztuta daudenean oso kontuz mugitu behar dira, oso erraz puskatzen baitira.
Torradak edo ogi galdua garrantzitsua da ogia ongi bustitzea	Askotan kanpotik bai baina barrutik lehorrak egoten dira.
Torradak edo ogi galduak egiteko ogi mota	Ogi mota desberdinekin egin daiteke, baita gurina dutenekin ere, betiere bezperatik lehortzen utziko bagenitu.
Torradak edo ogi galduak frijitzeko garaian	Suaren tenperaturarekin jokatu behar da kolore polita har dezan.
Torradak edo ogi galduak frijitzeko	Olioa bi frijitu aldiko iragaztea ere komeni da.
Torradak edo ogi galduak	Banillarekin edo esneari beste lurrin bat emango liokeen espeziarekin ere egin dezakegu.
Txokolate trufa harrotzeko	Betegaiak oso hotz egon beharko du. Tresna guztiek ere hotz eta garbiak egon beharko dute.
Txokolatea bainu marian urtzeko	Urak ez du inoiz irakin behar.
Txokolatea urtzeko bi aukera	Maria bainuan urak irakin gabe, edo mikrouhinean tenperatura baxuan. 100 g. zatituak. 90 segundo.

Haragien prestaketak truko eta aholkuak

Haragien prestaketa

Aholkuak	Azalpena
Behi muturrak	Egosi ondoren arrautza eta irinetan pasa ordez, arrautza eta ogi birrinduan pasa ditzakegu. Piper berde frijitu batzuekin oso goxoak geratzen dira
Behi muturrak	Arrautzeztatuak saltsarekin egos ditzakegu, baina, arrautzeztatua altxatzeko aukera handiak daude, eta, beraz, momentuan jatea komeni da.
Behi muturrak	Egosteko denbora asko behar dute, eta espres eltzean asko aurreratuko dugu.
Behi muturrak frijitzeko	Kazolatik ateratakoan, salda ongi xukatu. Hori egin ezean, salda hori gelatina bihurtzen da eta ondoren frijitzeko garaian olio zipriztinak ikaragarriak izan daitezke.
Biribilkia egina dagoen jakiteko	Labana bat erdiraino sartu eta ea biguna dagoen ikusi.
Biribilkia prestatzeko kazola	Estua aukeratu, biribilkia estaltzeko ur kantitate handiegia behar ez izateko, eta bukaerako saltsa arinegia ez gelditzeko.
Behiki buztana egina dagoen jakiteko	Zati bakoitzak denbora desberdin bat behar du biguntzeko; beraz, banan-bana labanarekin egina dagoela egiaztatu behar da.
Behiki buztana egosteko	Behi zaharrarenak badira, denbora asko behar dute egosteko. Presio eltzea erabil genezake denbora aurrezteko. Hala ere, bukaeran, haragia egina dagoen edo ez jakiteko ohiko kazola bat erabili beharko dugu.
Behiki buztana erosteko garaian	Etxean kozinatzeko, buztana moztua erosi, etxean mozteko labana ona eta esperientzia behar baita.
Behiki buztanaren lagungarriak	Patata edo bestelako pureak izan daitezke lagungarri bikainak.
Haragi xerra fin bat plantxan edo parrilan egiteko noiz gazitu	Egin ondoren gazituko dugu, barruko zukuak gal ez ditzan eta ez dadin lehortu.
Haragi zati gogorrak nola kozinatu	Haragi hauentzat gisatze teknika erabili beharko dugu.
Haragia xerra lodia plantxan edo parrilan egiteko noiz gazitu	Aldez aurretik gazituko dugu, barruko zukuak mugitzeko.
Haragiak, bigun eta handiak nola kozinatu	Labeko erreketa bikain doakio.
Haragia, anoentzako pisu gomendagarria	Freskoa hezurduna ( Saiheskia, arkumea) parrilan, labean edo plantxan egiteko pertsonako 350g eta 450g bitarte kalkulatu. Haragia, anoentzako pisu gomendagarria
Haragi bolak edo hanburgesak egiteko haragia	Behiki eta txerriki haragia erdibana nahastuta gozoagoak geratuko dira.
Haragi zati txikiak eta bigunak zein teknikarekin kozinatu	Frijituta, salteatuta, plantxan edo parrilan.
Lumadun ehiza labean gutxi egina jateko	Animalia gaztea izatea komeni da.
Urdai gazia frijitu edo plantxan egiteko	Aldez aurretik uretan edo esnetan beratzen eduki genezake; hartara, ez da horren gazia egongo.

Itsaskiak prestatzeko truko eta aholkuak

Itsaskiak prestatzeko

Aholkuak	Azalpena
Itsaski biziak noiz egosi	Kontserbatzeko eta haztegirik ezean, onena ahalik eta azkarren egostea izango da.
Itsaski biziak nola egosi	Gehienak ur hotzetatik abiatuta egosten dira; Aginik gabeko eta hildako itsaskiak berriz ur irakinetatik.
Itsaski handi eta biziak egosteko	Ur hotzetatik abiatuta. 100 g. bakoitzeko minutu bat egosi, beraz, 1000 g.-ko otarraina 10 minutu. Itsasoko ur garbia edo 45-50 g. gatz litroko. Ipurdiz gora utzi hozten. Nekorak 3 minutu. Itsaskiari hankarik edo bestelakorik faltako balitzaio, estali zuloa ogi mamiarekin, egosi aurretik.
Itsaski saltsak egitekoan zaintzekoa	Ganbek eta krustazeoek hondar fin-fin moduko bat askatzen dute. Hori ondo kentzeko, oso iragazki finetik pasatu beharko dugu.
Itsaski txiki hilak, lanpernak eta karrakelak egosteko	Ur irakinetik abiatuta. Itsasoko ur garbia edo 45-50 g. gatz litroko. Otarrainxkak 2 minutu, ganbak minutu 1, lanpernak 30 segundo. Karrakelak berriro irakiten hasi bitarte.
Itsaski zomorroak (krustazeoak) egosi ondoren	Hozten buruz gora utzi, barruko likidoa oskolean gera dadin.
Itsaskiak egosteko erramua	Erabiltzeko ohitura dago toki batzuetan.
Itsaskiak egosteko	Itsasoko ur garbia edo ur litroko 35-45 g. gatz.
Muskuilu, txirla edota ardo zuriarekin kozinatzen dugunean, kontuz gatzarekin	Normalean ardo zuria eta txirlak gehituta, ez du gatzik behar, baina bakoitzak balora dezala.
Txipiroi tinta naturala	Ezin da konparatu izoztutakoarekin, lehena askoz zaporetsuagoa da eta askoz gehiago belzten du.
Txipiroiak edo begi handiak	Freskoa bada eta azala garbia badu, ez dugu zertan kendu. Zapore berezia emango dio.
Txipiroiak edo txibiak frijitzeko	Hauek zenbat eta handiagoak izan, orduan eta uztai finagoak moztuko ditugu.
Txipiroiak tintan	Esaten da plater hau hurrengo egunean goxoagoa dela.
Txirlak zabaltzeko	izan dezaketen hondarra saihestu nahi bada, aparteko kazola batean lurrunetan zabaldu ditzakegu, legatzari gehitu aurretik.
Txirlak	Ireki arte bakarrik eduki behar dira sutan, denbora gehiago edukiz gero, lehortu eta txikle testura hartzen dute.
Txirlak	Erabilitakoan kontuz gatz kopuruarekin: gogoratu saltsa nahikoa gazituko dutela.

Pasta eta ore gaziak prestatzeko truko eta aholkuak

Pasta eta ore gaziak prestatzeko

Aholkuak	Azalpena
Enpanada edo opil gazien betegaiak	Ezin du inoiz oso bustia egon, bestela alboetatik atera daiteke. Hori ez gertatzeko osatzen dugu soka moduko hori izkinetan.
Enpanadillak	Frijitu beharrean, labean ere egin daitezke; horrela, olio gutxiago izango du.
Enpanadillak	Betegarri desberdin ugari erabil dezakegu.
Fideua egosteko denborak	Fideoaren tamaina zenbakia edo kopuruaren arabera, denbora gehiago edo gutxiago beharko du egosten.
Irin tortilla noiz jatea komeni da	Momentuan jatea komeni da; hori egin ezean, estalitako ontzi baten gordeko genuke ez lehortzeko.
Irin tortillak edo taloak egosteko garaian	Honek puztu egin behar du. Hori da egina dagoela adierazten digun puntua.
Irin tortillak edo taloak egiteko	Nahasten dugun ura epel beroa behar du izan. Almidoia solta dezan laguntzen du, modu horretan orea hobeto landu eta egosten da.
Ore gaziak egiteko ur kantitatea	Irin edo semola bakoitzak duen glutenaren arabera, ur gehiago edo gutxiago onar dezake; beraz, ura beti poliki poliki gehitzen joan.
Orly orea zein likidorekin busti	Uraren edo esnearen ordez, edari karbonikoren bat erabil daiteke( zerbeza, ura gasarekin, sagardoa); kasu horretan legamia ken genezake, baina hori azken momentuan egin beharko litzateke. Bigarren modu honetan zarakar gutxiago egingo dio.
Orlya prestaketa gazietarako	Azukrea kendu egingo genioke.
Orlya zer da	Frijitu aurretik, osagaiak estaltzeko erabiltzen den orea dugu, tenpuraren antzekoa.
Pasta freskoa egosteko	Ur irakinetara bota eta gora igotzen denean, minutu pare batean egina dagoela esan nahiko du.
Indar irina	Gluten kopuru handia duen irina da, pastak eta ogiak egiteko egokiena. Pasta freskoa: Indar gariarekin edo semolarekin egitea da egokiena. Horrela egingo bagenu ura eta gatzarekin bakarrik nahiko litzateke prestatzeko.
Pasta freskoa	Indar irinik edukiko ez bagenu, arrautza jar diezaiokegu ore trinkoa lortzeko.
Pasta italiarra kaneloi eta lasagna zein kazolatan egosi	Kazola zabalean egosi behar dira.
Pasta italiarra pesto saltsarekin	Beti sutatik kanpo nahastu behar da.
Pasta italiarra egosteko denborak	Desberdinak izaten dira; pasta zenbat eta lehorragoa, orduan eta denbora gehiago beharko du. Beraz, beti saltzaileak idatzitako denborak errespetatu edo minutu bat gutxiago egosi. Pasta freskoak 3 minutu behar izaten ditu.
Pizzarako orea egiteko	Irin egokiena indarduna eta semolazkoa da.
Talo orea prestatzerakoan ur beroa	Almidoia solta dezan laguntzen du, modu horretan orea hobeto lantzen eta egosten da.
Taloa egosteko	Egosteko garaian, puztu egin behar du. Hori da egina dagoela adierazten duen seinalea.
Tenpura nola egin	Jatorrizko errezetan bi gari irin erabiltzen dira: normala eta trisol irina, ur izoztua eta gatza. Trisol irina lortzeko arazoak direla medio, gorringoa gehituko diogu. Eta ura hotz mantentzea zaila denez, izotz zatiak edo legamia gehitu daiteke.
Pasta italiarra nola egosi	Egostera botatzen ditugunean, ongi zabaldu eta minutu batez nahastu egingo ditugu, elkarri itsas ez daitezen.
Pasta lehorrak pertsonako eta mahaikideko errazioak	80 eta 100g bitarte kalkulatu.

Saltsak eta saldak prestatzeko truko eta aholkuak

Saltsak eta saldak prestatzeko

Aholkuak	Azalpena
Bexamel saltsa desberdinen irin neurriak	Kroketak egiteko garaian litro esneko 120 g. eta 150 g. artean erabiliko dugu. Bexamela osagai bat gainetik estaltzeko bada 80g irin, eta saltsa arin bat egiteko bada, berriz, 50 g.-60 g. irin litro esneko.
Bexamel saltsa, estaltzeko	Ez utzi hozten, momentuan erabili beharra dago, bestela oso azkar loditzen da eta ez du balioko estaltzeko.
Gorringo ugariko saltsak	Ez dira irakin behar, gehienez ere berotu, gorringoa ez mamitzeko.
Jatorrizko Villeroy bexamela egiteko	Saltsa egina dugunean, eta sutatik kanpo, gazta birrinduarekin eta gorringoarekin loditzen da. Osagai desberdinak estaltzeko balio du.
Maionesa moztuarekin zer egin	Normalean, gorringo kopuruarekin alderatuz olio kopuruan pasa egin garen seinale da; beraz, beste gorringo bat gehitu beharko diogu eta, olio pittin bat gehiago. Baina kontuz, olioarekin berriz pasako bagina, berriz ere moztu egingo litzateke.
Maionesa olio kopurua	Olio kantitatez pasatuko bagina, moztu egingo litzateke.
Maionesan olio kopurua	Arrautzaren tamainaren arabera, olio gehiago edo gutxiago onartuko digu.
Ozpin-olio oinarrizkoari zer gehitu	Mota guztietako lagungarriak gehitzea dago. Tipulina, mostaza, arrautza gortua, piper berdea, fruitu lehorrak, pipermina, …..
Ozpin-olioari zenbat ozpin gehitu	Gustuen arabera, ozpina gutxiago edo gehiago gehitu daiteke.
Salda gardena lortzeko	Osagaiak oso ondo garbitu, kontu handiarekin marmitan sartu, eta irakinaldiak su motelean egin. Iragazi ere poliki eta kontu handiz egin.
Salda gorria	Itsaski edo arroz prestaketak burutzeko erabiliko dugu.
Salda ilunak	Saltsa eta prestaketa ilunak kozinatzeko erabiltzen da.
Saldak noiz gazitu	Beti amaieran gehitu.
Saldak ur hotzetatik abiatu	Beti, eta gatza amaieran gehitu.
Saldei koipea kentzeko	Prestaketa hozten utzi eta koipea gainean pilatu eta kasu askotan solido bihurtuko da; momentu horixe izango da egokiena soberako koipea kentzeko.
Salteatzeko noiz gazitu	Aldez aurretik pittin bat gazituko genuke eta amaieran puntuan jarri.
Saltsa berdean	Garrantzizkoa da baratxuriak kolorea ez hartzea; beraz, oso gainean egon behar da.
Saltsa berderako ura edo salda,, eta zein salda	Saltsa zertarako erabiliko dugunaren baitan izango da. Osagarri oso zaportsuak erabiliko bagenitu, ura gehitzearekin nahiko, aldiz kontrakoa bada salda bat gehitzea litzake egokinea. Prestaketaren arabera salda bat edo beste erabiliko dugu.
Saltsa iluna lortzeko	Urarekin busti aurretik, marmitan tomate birrindua karameliza dezakegu edo tipula xerra txigortu batzuk gehitu.
Saltsen kolorea mantentzeko	Saltsa irabiagailutik pasako bagenu, kolorea asko galduko luke. Beraz, kolorea mantentzeko puregailutik pasatzea egokiagoa da.

Errezetan neurrien baliokidetasunak

Osagai solidoak : Irina, azukrea, arroza, lekaleak, fruitu lehorrak

• Ondo betetako zopa koilarakada: 20-25 g.
• Arrasean betetako zopa koilarakada: 10 g.
• Ondo betetako azkenburuko koilarakada: 10 g.
• Arrasean betetako azkenburuko koilarakada: 5 g.
• Ondo betetako kafe koilarakada: 5 g.
• Arrasean betetako kafe koilarakada koilarakada: 3 g.
• Pitin bat: 3 g.
• Kafesne katilua: 165 g.
• Jogurt ontzia: 110 g.
• Barrako ogian 3 Behatz: 30 g.
• Gurin intxaur bat: 30 g.

Osagai likidoak: Ura, esnea, olioa

• Zopa koilarakada: 10 ml
• Zurrusta motza: 25 ml.
• Zurrusta luzea: 50 ml.
• Sagardo edalontzi edo baso: 490-500 ml.
• Kafesne katilua: 200 ml.
• Jogurt ontzia: 125 ml.