Sukaldaritza liburua/Gozogintza/Kremak eta Saltsak

Sukaldaritza Liburua

Teknikak · Osagaiak · Prestaketak · Gozogintza · Truko eta Aholkuak · Tresneria ·Glosarioa · Errezetak

Gozogintzako kremak erabilpen ugari dituzten prestaketak dira. Betetzeko, estaltzeko edo beste prestaketa batzuen oinarri moduan erabiltzen dira.

Saltsak aldiz, platerak edertzeko, hornigai moduan edo platera batzuen oinarri izan daitezke.

Esnea oinarri duten kremak

Krema ingelesa

Gozogintzako oinarri ugaritarako erabil daitekeen krema bat dugu. Izozkiak egiteko, mousseak prestatzeko, saltsa moduan erabiltzeko... Errezeta.

Pastel krema.

Tarta, opil edo prestaketa desberdinak betetzeko esneki krema oso tradizionala dugu.

Txokolate krema

Pastel krema bati 40g txokolate estalki gehituz lortuko dugu. Prestaketak mota desberdinak betetzeko.

Kafe krema

Pastel krema bati kafe kikara bat edo kafe hauts disolbagarri zorro bat edo bi gehituz lortuko dugu. Hau ere betegai moduan erabiltzeko.

Karamelu krema

Kasu honetan, pastel kremari karamelua gehitu beharko zaio, prestaketa desberdinen betegai moduan erabiltzeko.

Lyongo krema

Pastel krema gurin kremarekin nahastuta lortzen da.

Saint Honoré krema edo chiboust krema

Krema pastelerari merenge suitzarra batuta lortzen den krema da. Krema hau Choux orearekin egindako Sain Honoré pastela egiteko erabiltzen da. Saint Honoré pastela egiten da galleta-oinarri borobil baten alboetan, choux pasteltxoak bata bestearen ondoan, eta gainean jarriz. Karamelua erabiltzen da opiltxoak bata bestearekin itsasteko. Pastelari kono forma edo saski forma emanez.

Esne-gaina eta gurina oinarri dituzten kremak

Chantilly krema

Tarta edo opil desberdinak betetzeko edo edertzeko erabiltzen den banilla zaporeko esne-gain krema dugu.

Trufa gordin krema.

Txokolatea eta esne-gaina oinarri dituen betegaia. Biak ongi batu eta hoztu ondoren txokolate prestaketak betetzeko erabiltzen da.

Txokolate ganatxea edo trufak egosia

Kasu honetan esne-gaina egosi egiten da lehenik, eta ondoren, txokolatea gehitu. Trufak egiteko, txokolate betegai moduan edo prestaketa desberdinak edertzeko balioko du.

Gorringo krema

Gorringo eta azukre ugarirekin egiten den krema dugu. Kontu handiz egin behar da, almibar bat egin ondoren gorringoarekin nahastu eta egosi egiten da, baina kontu handiarekin. San Markos pastela egiteko,ijito-besoa, edo gozogintzako prestaketa ugaritarako. Askotan amaieran, gainetik erre egiten da. Errezeta hau berau arto irin finduarekin ere prestatzen da; kasu horretan gorringo gutxiago erabiltzen da.

Gurin krema

Garai batean asko erabiltzen zen krema dugu, baina gaur egun askoz gutxiago erabiltzen da. Izenak dioen moduan, krema honek gurina du oinarri. Almibar bat eta gorringoak ere izango ditu lagungarri. Bereziki pastelak estaltzeko eta mahukarekin edertzeko erabiltzen da. Banillazkoa edo kafezkoa ere egiten da. Fruta oinarri duten kremak

Limoi krema

Limoi zukuak ez du esnekirik onartuko hau moztu egingo bailitzateke; beraz, gorringoarekin loditzen da. Fruta duten tartak edo tartaletak betetzeko erabiltzen da.

Laranja krema

Limoi kremaren oso antzekoa, baina laranja zukua erabiliz, fruta duten tartak edo tartaletak betetzeko erabiltzen da.

Zuringoa oinarri duten kremak

Italiar merengea

Zuringoa hari puntuan dagoen almibarrarekin harrotzen da. Pastelen estalki gisa edo betegai moduan erabiltzen da.

Suitzar merengea

Kasu honetan zuringoa azukre zuriarekin harrotzen da. Mila-orriak edo bizkotxoak betetzeko erabiltzen da.

Fruitu lehorrak oinarri dituzken kremak

Hur edo arbendol pralinea

Azukrea eta limoiarekin karamelu alderantzikatu bat burutuko dugu eta bertan fruitu lehor pikortua eta pittin bat txigortua egosiko dugu. Ondoren, ongi birrintzeko, pasta bat sortu arte. Krema desberdinei gehitzeko, izozkiak burutzeko, bonboi betegaiak egiteko.....

Gianduja krema

Bonboiak betetzeko, txokolate estaldura %60 eta pralinea %40 nahasten dira.